1. Aatsitassarsiortoqalinnginnerani/-qarneranilu misissuinerit tunuliaqutaasut avatangiisinik misissugassanik katersinerit

    Ilisimatuussutsikkut siunnersortip Gert Asmundip aatsitassarsiornermik suliat avatangiisinut sunniutaasa qanoq uuttortarneqartarnerat oqaluttuaraa. Siullermik aatsitassarsiornermik suliat aallartinnginnerini avatangiisit qanoq innerat nalilersorniarlugu tunuliaqutaasussanik misissuisoqassaaq, kingornatigut aatsitassarsiortoqarnerani avatangiisit qanoq innerat pillugu nalilersuinissanut misissuinerit nutaat pissallutik. Avatangiisit qanoq innerat nalilersorniarlugu assigiinngitsunik avatangiisinik misissugassanik katersisoqartarpoq saffiugassat aalajangersimasut kemikaliallu misissugassani taakkunani annertussusaat uuttortarniarlugu. Saffiugassat kemikaliallu aatsitassarsiortoqalinnginnerata aatsitassarsiortoqarneratalu nalaani misissugassatut tigusani taakkunani annertussusaasa sanilliunnerisigut naatsorneqarsinnaavoq nalilersorneqarlunilu saffiugassat arlaasa annertussusaat imaluunniit assersuutigalugu aatsitassarsiorluni kemikaliat atukkat avatangiisinut sunniutaat qaffariaateqarsimanersoq.

    Gertip assersuutit aatsitassarsiornermi suliat atortorissaarutillu avatangiisinut sunniuteqarsinnaasut taallatsiarpai: Akuiagassat piiakkat, assannerlukut, sanaartukkat, soorlu akuiaaffiit suliarinneqqiffiillu, kemikaliat atorlugit suliarinniffiit, nukissiorfinniit mingutsitsinerit, akuiarnerlukuusiviit, sulisunut ineqarfiit, suliarinniffinnit saliiffinnillu imikoq.

  2. Aatsitassarsiornermik suliat avatangiisinillu allanngutsaaliuineq

    Pinngortitaleriffimmit ilisimatuussutsikkut siunnersortip Morten Larsenip aatsitassarsiornermik suliniutit avatangiisinut qanoq sunniuteqarsinnaanersut saqqummiuppai, aatsitassarsiornermik suliniutini suut mingutsitsissutaasarnersut assersuutinillu avatangiisit pillugit malittarisassaqartitsinermut tunngasunik avatangiisinut sunniutissat killilersimaarniarlugit najoqqutarineqartartunik ilanngussilluni.

    Avatangiisit pillugit malittarisassaqartitsineq ilaatigut teknikkip avatangiisinut pitsaasup atorneqarnissaanik aamma ingerlatseqatigiiffiit avatangiisinut mingutsitsisinnaasunik killissarititanik najoqqutaqarnermikkut killilimmik avatangiisinut aniatitsisinnaanerannik avatangiisit pillugit piumasaqaatinik imaqarpoq.

  3. Kuultisiorfiusimasumi Nalunami avatangiisinik malitsigiittumik malinnaaviginninneq nakkutilliinerlu

    Pinngortitaleriffimmit ilisimatuussutsikkut siunnersortip Morten Larsenip saqqummiuppaa

    Nanortallip eqqaani Itillersuarmi kuultisiorfiusimasumut Nalunamut atatillugu avatangiisinik malitsigiittumik malinnaaviginninneq saqqummiuppaa, kiisalu piffimmi tassani 2019-imi aasakkut misissueqqissaarnernik suliat nutaanik avatangiisinik nakkutilliineq.

  4. Misissugassatut tigusani assigiinngitsuni mingutsitsissutaasinnaasunik misissuilluni avatangiisinik malinnaaviginninneq

    Aallakaatitassiami ilisimatuussutsikkut siunnersortip Morten Larsenip annertunerusumik oqaluttuaraa avatangiisinik malinnnaaviginninnermi suut ilaasarnersut. Mortenip assersuutigai imermik misissugassat, orsuaasanik misissugassat, uillut qeqqussallu misissugassat katersorneqartartut mingutsitsissutaasinnaasunillu akoqassusaat misissoqqissaarneqartartoq.